Saitual Pastor Bial KTP Meet hmang.

Vawiin Dt.30.6.2011 (Thursday) hian Saitual Pastor Bial Kristian Thalai pawl Meet 2011 chu Saitual Chhimveng Kohhranah hman a ni a.Zing dar 6-ah Saitual Public Playground-ah heng intihsiakna Number Games, Sakuhuilût, Chain Ball Penalty shhot out leh Poison ball-ah te Branch inelna neih a ni a.

Chawei kham dar 10:00-a tan leh in Zaipawl (Nangma Thil ropuite an sawi), Male Voice,Female Voice leh Quartet-ah te intihsiak leh niin, Chawhnu lamah Bible Quiz (Rome Lehkhathawn), Extempore speech leh Drama (Thupui: Thuawihna) hmangin Branch inelna a awm leh a, Bial chhung member 300 dawn in he meet hi hlim takin an hmang a ni.

Zan lamah inkhawm awm lehin lawman sem leh result puanna neih a ni ang. Saitual chhimveng-in hneh takin Bial meet an thleng a, member tin ten nuam an ti hle tih thu kan dawng a ni.

Mizoram Table Tennis Championship Keifangah neih a ni.

Vawiin June 30 2011 (Ningani) hian Mizoram Table Tennis Association buatsaih, Mizoram table Tennis Championship 2011 chu Keifang Community Hall-ah neih tan a ni.

He Championship-ah hian hriattheih chinah Players inziaklut hi Association leh District hrang hrang atangin Players 381 an ni a. Mizoram Table Tennis player thate an tel kim hle a ni.

Category-a then dan

Mens’ singles ah 62,

Womens’ singles-ah 65,

Junior Boys’ Singles-ah 67,

Junior Girls’ Singles-ah 20.

Youth Boys’ Singles-ah 45;

Youth Girls’ Singles-ah 20,

Junior Veteran (above 35)-ah 26;

Veteran (above 45)-ah 11;

Senior Veteran (above 50)-ah 6.

Team Event-ah Mens’ team 16 an tel a ni.

Tournament hlawhtling taka neih a nih nan hian Keifang Games & Sport Association leh Saitual Table Tennis Association-te chuan theihtawpin hma an la a, Town area-a Deptt. Hrang hrangte phungbawmah sawmin, he championship khelhna hmun Keifang Community Hall pawh tha engemaw zat sengin mawihnai takin an buatsaih a ni. Mizoram Ranking Table Tennis Championship hian June 30 atanga July 2/2011 thleng a awh ang.

Jt.YMA Saitualin Miharsa In sak sak

Vawin Dt.18.June.2011 (Inrini ) khan Saitual Joint YMA chuan Pu Laldawmliana Saitual Dinthar veng ami in chu hnatlangin an sak sak.

Pu Laldawmliana hian in sa tura a inpuahchah laiin a In chhuat tur thingzai a zaina lamah a thingkih in a khup hnuai lamah a delh a, Aizawl Civil Hospital pan pui a ni a. Aizawl Civil Hospital ah hian hun engemaw chen an awm a. Mahse , thawktu thenkhat inthlahdah avangin a hun takah a hliam hi ngaihsak a ni loh a vangin Saitual CHC pan pui leh a ni a. Saitual ah hian tihngaihna a awm loh a vangin Durtlang pan pui leh a ni a, a ke hi an lo tansak ta a ni.

Hnatlang ah hian mi 150 vel an thawk chhuak a, mi tlawmngaite pawisa thawhkhawm hi Rs. 32,150/- a ni.