Kan hnungtawlh tan em ni...!!

Hun lo inher danglam zel hian mihring te pawh hi kan ngaihtuahna min her danglam sak nasa ta hle a ni tih chu sawi ngai lovin kan khawsak dan leh kan nunphung han en hian chiang takin kan hre thei awm e.

He khawvela kan lo pian chhuah ve hma daih tawh atang khan he kan Saitual khawtlang hian A.O kan lo nei ve tawh a, chu chu khaw thang zel leh hma kan sawn ve hret hret avangin Kum 2001 khan A.O chu SDO (C) in a rawn thlak ta a, vawiin ni thleng hian SDO (C) awpna hnuaiah he kan Saitual khawtlang hi kan la kal chho mek a ni. Theihpa tawpin khawtlangin hmasawn tumin kan bei a. Hun engemaw chen chu Town tih hmingpu in kan awm chho a, DHDC (District Headquarter Demand Committee) ten Sawrkar lam hotute an nawr angin Dt. 1st Sept. 2008 khan Saitual Town chu Sawrkar lam hotu ten District Headquarter ah min puang ve ta a. Khami ni khan kan lawmin khawtlangin kan lawm a nih kha. Tichuan a hming chuan District Headquarter tih hming chu vawiin ni thlengin kan la pu ve mek a, hmalakna leh District Headquarter a nih tur anga function thei si lovin kan awm mek a nih hi. District Headquarter a puan kan nih atangin vawiin ni thlengin DC pawh kan la nei lova, chumi achhapah kan SDO (C) neih ve chu Saitual khua atangin Keifang ah sawnchhuah a la ni maithei zui lehnghal a, ngun taka ngaihtuah tu tan chuan a beidawnthlak teh zawng a nih hi.

He thilah hian tu hi nge mawhphur kan in en fiah theuh angai khawp mai, Khawtlang mipui lah kan lungrual lo, kan lungrual loh zia ti lang tu chu MG-NREGS ni 100 inhlawhna chung changah hian sawi tam ngai lovin a hriat theih. A lehlam zawng chuan mipui te chu a thuhmun thap theih tak tak loh a, Khawtlang hruaitu te hian kan an zir lo hmasa zawk em ni ang…?!. Mipui leh khawtlang hmangaih tak tak tu tan chuan tun kan hun tawng mek a khawtlang hruaitu a hming a lo nih ve pawh hi a zahthlak lek lek chu a ni.

SDO (C) sawnchhuah chung changah pawh engati nge mi khaw V/C ten Office hmun tur ram an pek theih lai a Kan khaw V/C ten ram an pek ve mai loh. Nge an duh tawh lova chhuak sela an duh, Mahni hna leh chhungkaw nawmsakna tur ringawt buaipui lo, hmalam hun thlir a, khawtlang hmangaihtu dik tak hruaitu kan mamawh a ni mai lo’ng maw..? Hmasawn aiin hnungtawlh hi thil hlauhawm tak a ni, mahse tun ang dinhmunah hi chuan kan hlauh ang ngei ngei hian kan hnungtawlh dawn..! Saitual khua a din tan atangin a la hnungtawlh ngai lo. Keimah vanga he khawtlang hi a hnung tawlh ai chuan tiin ngaihtuahna te hi an seng ve ngai em le..

Hun engemaw ti atang khan kan V/C te hian Contract an thawk nasa em em a, hei pawh hi tunhma a kan V/C lo ni tawh thin ten contrac an thawh vak vak kan hre ngai lo. Tunah erawh chuan II class Contractor ai chuan khawkhat V/C te an hlawk tawh zawk hial ang. Mahni inhai vur ai chuan Khawtlang hmangaih tu nih hian kan hming a tha zawk dawn tih kan hre theuh a ni lawm ni? Kan Pathianthu-ah pawh Sum tamtak aiin hmingthat hi thlan zawk tur a ni; Tangka leh rangkachak aiin duhsakna angainat awm… tiin kan hmu a nih kha.

Thalai naupang zawk leh thangthar lola awm mek tur te tan he kan khawtlang hi eng angin nge a la awm chhoh dawn tih hi ngaihtuah chian a ngai khawp mai. ‘Tunah hian siamtha tu nge tichhetu leh ti hnungtawlh tu kan nih,’ tih hi kan khawtlang hruaitu te hian mahni in en nachang hre ve sela a duhawm khawp mai. 2015 ah Centenary lawm turin kan in buatsaih a, Kum 100 hmel hmu tawh mai tur si in tun thlengin Internet pawh kan la hmang thathum thei lo te hi a zahthlak. Mutmawh hnarmawh ah nei ve deuh sela a duhawm khawp mai. Kan dawihzep a, thil hi kan palzam lutuk hi a dik lo, huaisen tak a kan auchhuah pui ve a tul tawh a ni mai lawm ni..?

He kan pianna hmun leh kan nu leh pa te lu kan lo phumna hmun kan khaw neih chhun hi kei (Saitual khua lo chu ka khua ti a sawi tur nei ve lo) hian Fahrah enkawltu leh hmangaihtu nei lo ang mai a a tal vel tur hian ka phal thei ngang lo a ni.